ភ្នំពេញ៖ កូនប្រុសរបស់សម្ដេចតេជោ ហ៊ុន សែន គឺលោក ហ៊ុន ម៉ានី លោក ហ៊ុន ម៉ាណែត និងលោក ហ៊ុន ម៉ានិត បានសម្តែងការខកចិត្តចំពោះការរាយការណ៍របស់កាសែត The Guardian ដែលបានចុះផ្សាយកាលពីថ្ងៃទី៣ ខែតុលា ថាសម្ដេចតេជោ កំពុងកាន់លិខិតឆ្លងដែនប្រទេស Cyprus។

តំណាងរាស្ត្រមណ្ឌលកំពង់ស្ពឺ លោក ហ៊ុន ម៉ានី មានប្រសាសន៍ថា លោកមិនដែលឮថាឪពុករបស់លោកគឺសម្ដេចតេជោ បានស្នើសុំសញ្ជាតិណាផ្សេងក្រៅពីការប្តូរផ្តាច់នឹងឈាមខ្មែរ ដែលម្តាយ ឳពុករបស់លោកបានផ្តល់ឲ្យនៅលើមាតុភូមិកម្ពុជាឡើយ។

លោកបន្ថែមថា នេះជាពេលដែលត្រឹមត្រូវដែលកម្ពុជាឈានទៅដល់ការយកលក្ខខណ្ឌសញ្ជាតិកម្ពុជាតែមួយ មកកំណត់ចំពោះការកាន់តួនាទីកំពូលនៃស្ថាប័នជាតិនានា។ ហើយអ្នកដែលចង់ចូលរួមក្នុងការអភិវឌ្ឍជាតិ ហើយសំឡឹងមើលតួនាទីកំពូលប្រហែលជាអស់ហើយ ម្យ៉ាងទៀតនេះក៏ជាការបង្ហាញនូវភាពស្មោះត្រង់ចំពោះជាតិនិងប្រជាជនផងដែរ។

ទន្ទឹមនឹងនេះមេបញ្ជាការកងទ័ពជើងគោក លោកឧត្តមសេនីយ៍ឯក ហ៊ុន ម៉ាណែត បានលើកឡើងថា លោកគាំទ្រប្រសាសន៌របស់សម្តេចតេជោដែលលើកឡើងថា ថ្នាក់ដឹកនាំកំពូលរបស់ជាតិគួរមានសញ្ជាតិតែមួយគត់គឺ សញ្ជាតិខ្មែរ ដោយថា៖ «អ្នកនយោបាយណាម្នាក់ដែលតាំងចិត្តធ្វើជាអ្នកដឹកនាំកំពូលរបស់ជាតិ ដែលទទួលខុសត្រូវលើជោគវាសនានិងផលប្រយោជន៍ជាតិខ្មែរ ត្រូវហ៊ានលះបង់អ្វីៗទាំងអស់ដើម្បីបុព្វហេតុជាតិនិងប្រជាជនខ្មែរ កុំថាឡើយតែលាលែងសញ្ជាតិបរទេសនោះ (បើមាន)»។

អគ្គនាយកនៃអគ្គនាយកដ្ឋានស្រាវជ្រាវចារកិច្ចនៃក្រសួងការពារជាតិលោកឧត្តមសេនីយ៍ឯក ហ៊ុន ម៉ានិត ក៏បានគាំទ្រដល់ការសម្រេចរបស់ សម្ដេចតេជោ ដោយលើកឡើងថា៖ «ក្នុងនាមខ្ញុំជាប្រជាពលរដ្ឋខ្មែរម្នាក់ ខ្ញុំសូមគាំទ្រគំនិតផ្តួចផ្តើមរបស់សម្តេចតេជោ ដែលបានលើកឡើងថា "ថ្នាក់ដឹកនាំកំពូលរបស់ជាតិ ត្រូវមានសញ្ជាតិតែមួយគត់" ដើម្បីការពារផលប្រយោជន៍របស់ជាតិ»៕